Euskotrenek Gasteizko tranbiaren eta kamioi baten arteko talka bat birsortu du, segurtasun-protokoloen eraginkortasuna egiaztatzeko

Euskotrenek, Eusko Jaurlaritzako Mugikortasun Jasangarria Sailaren mendeko sozietate publikoak, larrialdi-simulazio bat egin du gaur goizean, martxoaren 27an, Gasteizko tranbian. 10:30ak pasatxo zirenean, Landaberde kalean, Ibaiondoko kotxetegien irteeran, tranbiaren konboi baten eta kamioi baten arteko talka simulatu da. Simulatu den egoeran, sei pertsonak ‘zaurituak’ izan dira, tranbia-unitatea errailetik atera eta kamioiaren biltegitik gasolioa isuri da.

Birsorkuntza horretatik abiatuta, kasu horietan ohikoa den jarduera-protokoloa abiarazi da, tranbia gidatzen duen agenteak Euskotreneko aginte-postura deitu baitu lehenengo, eta hark 112 larrialdi-zerbitzura. 

Kanpoko laguntza iritsita – Udaltzaingoa, Suhiltzaileak, Ertzaintza eta osasun-zerbitzuak –, zauritutako sei pertsonak erreskatatu eta arreta medikoa eman zaie, eta gasolio-isuriari eusteko lanak ere egin dira, horiek ez hedatzeko eta estolderia-sistematik edo euri-uretatik iragazteko. Azkenik, eremua segurtatu eta hustu ondoren, unitatea bideratzeko lan teknikoa egin da.

Simulazio honen helburuak bat baino gehiago izan dira. Alde batetik, Autobabes Plana ebaluatzea, benetako larrialdi baten aurrean erantzuteko gaitasuna neurtuta, bai barnekoa bai kanpokoa; eta, bestetik, kanpoko laguntza-zerbitzuekin jarduteko, komunikatzeko eta koordinatzeko plan eta protokoloen eraginkortasuna eta operatibotasuna ziurtatzea.

Aldizka egiten diren horrelako ariketa simulatuak beharrezkoak dira herritarrei segurtasun- eta eraginkortasun-baldintza onenetan zerbitzua emango zaiela bermatzeko; izan ere, tranbian gertatutako ezbehar batek neurri handiagoak hartzea eragozten dute, eta larrialdi-sistemak eta arrisku-egoeretan aktibatzen diren gailuak osatzen dituzten agenteekin koordinatzeko gaitasuna egiaztatzen dira.

Euskotrenek zuzendu duen simulazio hori egiteko, Gasteizko Udaleko Herritarren Segurtasunerako Sailak (Udaltzaingoa eta Suhiltzaileak), Eusko Jaurlaritzako Larrialdi Zentroak (112), Eusko Jaurlaritzako Larrialdiei Aurre Egiteko eta Meteorologiako Zuzendaritzak, Ertzaintzak eta Osakidetzak parte hartu eta koordinatu dute, eta ustezko zaurituak artatzeko triaje-eremu bat zabaldu dute.