Euskotrenek Bilboko metroaren 5. linearako bost tren berriren fabrikazioa enkargatu du

• Unitate horien kontratua CAF enpresari adjudikatu zaio, 53,6 milioi euroko zenbatekoan
• Horrez gain, CAF SIGNALLINGekin ERTMS ekipoen hornidura kontratatu da, 4,6 milioi euroan

Euskotrenek, Eusko Jaurlaritzako Lurralde Plangintza, Etxebizitza eta Garraio Sailaren mendeko sozietate publikoak, CAF enpresa beasaindarrari adjudikatu dio bost unitate aniztun elektrikoren (UEA) hornidura, 53,6 milioi euroko zenbatekoan (53.637.578, BEZ barik). Unitate horiek 2026ko erdiaren eta 2027aren artean entregatuko dira. Unitate horiek 980 serie berrian txertatuko dira eta Bilboko metroaren 5. linearen eragiketara bideratuta daude (Euskotrenek kudeatuko du linea hori).

S-980, hasiera batean, lau kotxez osatutako bost EMUk osatzen dute, Motor-Motor-Atoi-Motor (MNRM) osaeran, 400 pertsona garraiatzeko gaitasun nominalarekin. Gainera, unitateek bainugela egokitu bat izango dute mugikortasun murriztuko pertsonentzat.

Unitateak trenbide-sektoreko berritasun aurreratuenak izango dituzte teknologian, fidagarritasunean, jasangarritasunean, segurtasunean eta ergonomian. Halaber, sarbide-ateetan txertatutako arrapalak izango dituzte mugikortasun urriko pertsonentzat, bai eta itsuentzako soinu-abisuak eta entzuteko zailtasunak dituzten pertsonentzako argi-seinaleak ere. Unitate berriak jasangarriak dira, eta ingurumen-arau guztiak beteko dituzte, bai eta material guztien bizi-zikloak ere.

Euskotrenek tren- eta metro-zerbitzuko material mugikorraren modernizatze-prozesua 2011n hasi zen, 900 serieko EMUak martxan jarri zirenean. Prozesu hori ondorengo urteetan osatu egin da 950 serieko EMUak gehitzean. 2023 ekitaldi honetan, beste lau tren jaso dira (940 serieko EMUak), S-950eko trenen oso antzeko ezaugarriak dituztenak. Lau tren horiek etengabeko hobekuntzak ekarri dituzte teknologia- eta segurtasun-prestazioetan, flota osoaren barruko eta kanpoko diseinuak homogeneotasun-sentsazioa ematen den bitartean. 

S-980 serieko tren berriek Euskotreni gaitasun handiagoa emango diote eskari gero eta handiagoari erantzuteko, bai kultura-, kirol- edo jai-ekitaldietarako zirkulazio berezietan, bai ohiko tren-eskaintzan; izan ere, horren beharrak handiagoak izango dira Bilboko metroaren 5. linearen ibilbide berria martxan jartzean, zeina Euskal Trenbide Sarearen (ETS) zuzendaritzapean eraikiko den. 

ERTMS ekipoen hornidura S-950erako

Bestalde, CAF SIGNALLING SLU arduratuko da 1. mailako ERTMS ekipoak hornitzeaz 950 seriea osatzen duten 28 unitateetan, 4 milioi eurotik gorako zenbatekoan (4.006.208, BEZ barik).

Horrela, Euskotrenek hobekuntza teknologikoez eta kalitatezkoez hornituko ditu unitate horiek. Hobekuntzok dagoeneko egin dira enpresa operadoreak ekitaldi honetan jasotako lau trenik modernoenetan (940 seriea), Euskal Trenbide Sarearen (ETS) seinaleztapen-sistemen azpiegiturek izan duten modernizatze-prozesura egokitzeko.